🔴 कणकवली शाळा नंबर ३ च्या माजी विद्यार्थ्यांचा २८ मे रोजी ऐतिहासिक स्नेहमेळावा

 🔴 कणकवली शाळा नंबर ३ च्या माजी विद्यार्थ्यांचा २८ मे रोजी ऐतिहासिक स्नेहमेळावा ; 

🔹 गुरुवंदना आणि ऋणानुबंध सोहळा रंगणार असून माजी विद्यार्थी संघाचे सर्व मित्रांना उपस्थित राहण्याचे आवाहन

​कणकवली: 

          सिंधुदुर्ग जिल्ह्यातील शैक्षणिक क्षेत्रात मानाचे स्थान असलेल्या आणि सर्वाधिक पटसंख्येचा गौरव लाभलेल्या 'कणकवली जिल्हा परिषद प्राथमिक शाळा नंबर ३' च्या माजी विद्यार्थ्यांचा भव्य स्नेहमेळावा येत्या २८ मे रोजी आयोजित करण्यात आला आहे. अनेक वर्षांनंतर एकत्र येणाऱ्या या मित्रांच्या मेळाव्याची उत्सुकता आता शिगेला पोहोचली असून, या निमित्ताने शाळेचा परिसर जुन्या आठवणींनी पुन्हा एकदा गजबजून उठणार आहे. या ऐतिहासिक सोहळ्याच्या नेटके नियोजनासाठी 'माजी विद्यार्थी संघ कार्यकारिणी' देखील सक्रिय झाली असून, मुख्य पदाधिकारी आणि सदस्यांनी सर्व माजी विद्यार्थ्यांना या मेळाव्यात सहभागी होण्याचे जाहीर आवाहन केले आहे. 

          या नूतन कार्यकारिणीमध्ये अध्यक्ष म्हणून रविंद्र सावंत, उपाध्यक्ष चेतन गोवेकर, सचिव अक्षया राणे आणि कोषाध्यक्ष म्हणून तेजस गवळी यांची निवड करण्यात आली असून, कार्यकारिणी सदस्य म्हणून संतोष घाडीगावकर, सुहास वरुणकर, संतोष मुसळे, सदानंद राणे, तुषार मोर्ये, प्रशांत गवळी, गणेश पारकर, आरती शिरसाट, योगेश जावकर, मुकुंद चिकोडी आणि अनिल अणावकर हे जबाबदारी सांभाळत आहेत.

​          या स्नेहमेळाव्यात केवळ जुने मित्र-मैत्रिणीच एकत्र येणार नाहीत, तर पहिली ते सातवीच्या वर्गात असताना ज्यांनी विद्यार्थ्यांवर सुसंस्कारांचे बाळकडू पाजले, त्या आदरणीय शिक्षकांचा 'गुरुवंदना सोहळा' आयोजित करून कृतज्ञतापूर्वक सत्कार करण्यात येणार आहे.      

          या संदर्भात भावना व्यक्त करताना शाळेचे एका माजी विद्यार्थ्याने सांगितले की, आमचा समाजशास्त्र आणि गणिताचा पाया भक्कम करणारे आदरणीय नारकर गुरुजी, कडक शिस्तीचे भोक्ते व माजी मुख्याध्यापक जॉन दियोग रॉड्रिग्ज गुरुजी आणि इंग्रजी-गणितात पारंगत असलेले कै. पाटकर गुरुजी यांसारख्या थोर शिक्षकांनी आमच्यावर केलेले संस्कार आम्ही कधीही विसरू शकत नाही आणि त्यांच्या ऋणाची जाणीव ठेवण्यासाठीच या मेळाव्याचे आयोजन करण्यात आले आहे. 

          २८ मे रोजी सकाळी ठीक ०८:३० वाजल्यापासून या मेळाव्याला सुरुवात होईल, ज्यामध्ये जुन्या वर्गात जाऊन आठवणींना उजाळा देणे, शाळा दर्शन, शिक्षकांचा जाहीर सत्कार, माजी विद्यार्थ्यांचे मनोगत व परिचय, स्नेहभोजन आणि दुपारच्या सत्रात गमतीशीर खेळ व मनोरंजनाचे कार्यक्रम आयोजित करण्यात आले आहेत. शेवटी सर्व मित्र आणि शिक्षकांचा एक भव्य 'महा-ग्रुप फोटो' काढून या अविस्मरणीय सोहळ्याची सांगता होईल. 

          माजी विद्यार्थी संघाचे अध्यक्ष रविंद्र सावंत, उपाध्यक्ष चेतन गोवेकर, सचिव तथा शाळेच्या मुख्याध्यापिका अक्षया राणे आणि कोषाध्यक्ष तेजस गवळी यांच्यासह सर्व कार्यकारिणी सदस्यांनी कणकवली शाळा नंबर ३ मधील सर्व आजी-माजी विद्यार्थ्यांना, तसेच देश-विदेशात आणि मुंबई-पुण्यासारख्या विविध शहरांत स्थायिक झालेल्या आपल्या सर्व जुन्या वर्गमित्रांना या सुवर्ण सोहळ्याचे साक्षीदार होण्यासाठी २८ मे रोजी आपल्या लाडक्या शाळेच्या कट्ट्यावर वेळेवर उपस्थित राहण्याचे मनापासून आवाहन केले आहे.

'बाबा आणि आम्ही': पिंगे सरांच्या ललित दुनियेतील हळव्या प्रवासाची कणकवलीत मैफल

🔴 लेखणीचा ‘परिमळ’ आणि आठवणींचा ‘स्पर्श’; कणकवलीत ‘बाबा आणि आम्ही’ मैफलीने वेधले रसिकांचे लक्ष

​कणकवली:

          मराठी ललित साहित्याचे मानदंड आणि शब्दांचे ऋषी मानले जाणारे ज्येष्ठ साहित्यिक रवींद्र पिंगे यांच्या जन्मशताब्दी वर्षाची सांगता कणकवली नगरीत एका अत्यंत हृद्य आणि भावूक सोहळ्याने झाली. कोकण मराठी साहित्य परिषद (शाखा कणकवली) आणि वसंतराव आचरेकर सांस्कृतिक प्रतिष्ठान यांच्या संयुक्त विद्यमाने आयोजित ‘बाबा आणि आम्ही’ या विशेष कार्यक्रमाने पिंगे सरांच्या साहित्य प्रवासासोबतच त्यांच्या हळव्या पितृत्वाचे पैलू रसिकांसमोर उलगडले.

​🔸आठवणींचा जीवनपट आणि मान्यवरांची मांदियाळी

​कार्यक्रमाच्या प्रारंभी रवींद्र पिंगे यांच्या प्रतिमेस अभिवादन करून स्मृतींना उजाळा देण्यात आला. यावेळी पिंगे यांचे सुपुत्र सांबप्रसाद पिंगे, कन्या चित्राताई वाघ, नातेवाईक राजेंद्र पिंगे, मिलिंद गोठीवरेकर व वैशाली गोठीवरेकर यांचे स्वागत करण्यात आले. कोमसापचे कार्यवाह निलेश ठाकूर, आचरेकर प्रतिष्ठानचे अध्यक्ष एन.आर. देसाई व सीमा कोरगावकर यांनी पाहुण्यांचे स्वागत केले.

​          कार्यक्रमाचे प्रास्ताविक कोमसापचे खजिनदार सिद्धेश खटावकर यांनी केले. पिंगे सरांच्या बालपणापासून ते त्यांच्या समृद्ध साहित्य प्रवासापर्यंतचा रंजक प्रवास एका प्रभावी चित्रफितीद्वारे मांडण्यात आला, ज्याने उपस्थित रसिकांना गतकाळात नेले.

🔹​गप्पांची रंगली मैफल: ‘बाबा’ आणि ‘साहित्यिक’ पिंगे

​         सोहळ्याचे मुख्य आकर्षण ठरला तो म्हणजे मुलांशी रंगलेला थेट संवाद. प्रसिद्ध निवेदक प्रसाद घाणेकर यांनी सािहत्यिकाच्या लेखणीमागील 'पिता' शोधण्याचा प्रयत्न केला. पिंगे सरांची लेखन पद्धती, त्यांची पर्यटनाची विलक्षण ओढ आणि कौटुंबिक जिव्हाळा यावर त्यांनी विचारलेल्या प्रश्नांना मुलांनी अत्यंत भावूक होऊन उत्तरे दिली. "साहित्यात रमणारे बाबा घरात कसे होते?" हे ऐकताना सभागृहातील रसिक श्रोतेही गहिवरले.

​🔸साहित्यातील समृद्धी: ‘परशुरामाची सावली’ ते ‘आनंदाच्या लाटा’

​यावेळी पिंगे सरांच्या अजरामर साहित्यावर सखोल मंथन करण्यात आले. त्यांच्या लेखणीतून उतरलेली ‘परशुरामाची सावली’ ही कादंबरी, ‘शतपावली’ आणि ‘आनंदाच्या लाटा’ यांसारख्या ललित संग्रहांनी मराठी मनावर अधिराज्य कसे गाजवले, यावर प्रकाश टाकला गेला. विशेषतः अंदमानहून परतलेल्या व्यक्तीची थरारक व्यथा सांगणारे 'निर्वासितांचे जग' आणि 'उफळे' गावातील निसर्गाचे त्यांनी केलेले जिवंत चित्रण यावर गप्पांच्या ओघात विशेष चर्चा झाली. त्यांच्या साहित्यातील प्रांजळपणा हाच त्यांच्या लेखणीचा खरा 'परिमळ' असल्याचे मत मान्यवरांनी व्यक्त केले.

​🔹अनुभवांच्या शिदोरीने रसिक तृप्त

​         केवळ मंचावरील संवादच नव्हे, तर प्रेक्षागृहातील मीरा प्रभू वेर्लेकर (गोवा), गजानन मांद्रेकर (गोवा) आणि प्रसाद कुलकर्णी यांनी पिंगे सरांच्या सहवासातील किस्से सांगून कार्यक्रमात अधिक जिवंतपणा आणला.

​या साहित्यिक मेळाव्यास सिंधुदुर्ग आणि गोवा येथील अनेक मान्यवर रसिक, साहित्यप्रेमी आणि आचरेकर प्रतिष्ठानचे कार्यकर्ते मोठ्या संख्येने उपस्थित होते. वसंतराव आचरेकर सांस्कृतिक प्रतिष्ठानच्या नाट्य संकुलात पार पडलेला हा सोहळा मराठी साहित्यातील एका महान लेखकाचा यथोचित सन्मान करणारा आणि रसिकांच्या स्मरणात कायमचा घर करून राहणारा ठरला.

🔴 तळेरे प्रभाग स्तरीय मुख्याध्यापक सभेत विस्तार अधिकारी रामचंद्र नारकर यांचा निरोप समारंभ संपन्न

🔴 तळेरे प्रभाग स्तरीय मुख्याध्यापक सभेत विस्तार अधिकारी रामचंद्र नारकर यांचा निरोप समारंभ संपन्न

​तळेरे (प्रतिनिधी): पीएमश्री प्रभाग शाळा तळेरे नं. १ येथे नुकतीच तळेरे प्रभाग स्तरीय मुख्याध्यापक सहविचार सभा उत्साहात पार पडली. या सभेचे खास वैशिष्ट्य म्हणजे शिक्षण विस्तार अधिकारी रामचंद्र नारकर यांचा सेवानिवृत्तीनिमित्त करण्यात आलेला भव्य सत्कार आणि प्रभागातील उत्कृष्ट कार्य करणाऱ्या शाळा व शिक्षकांचा सन्मान सोहळा. 

          या प्रसंगी व्यासपीठावर तळेरे शिक्षण विस्तार अधिकारी कैलास राऊत, केंद्रप्रमुख गोपाळ जाधव, केंद्रप्रमुख संजय पवार, उच्चश्रेणी मुख्याध्यापक प्रदिप श्रावणकर, विनायक जाधव, श्रीपाद बागडी, जगदीश गोसावी, आनंद तांबे, संतोष कुडाळकर आणि महेंद्र पावसकर आदि मान्यवर उपस्थित होते. प्रदीर्घ आणि निष्कलंक सेवेनंतर निवृत्त होत असलेले रामचंद्र नारकर यांचा मान्यवरांच्या हस्ते शाल, श्रीफळ आणि सन्मानचिन्ह देऊन गौरव करण्यात आला.

          ​तळेरे प्रभागामध्ये शैक्षणिक क्षेत्रात उत्कृष्ट कार्य करणाऱ्या शाळा आणि शिक्षकांचा यावेळी विशेष सन्मान करण्यात आला. यामध्ये 'मुख्यमंत्री माझी शाळा सुंदर शाळा' अभियानात तालुक्यात तृतीय क्रमांक पटकावल्याबद्दल पीएमश्री जिल्हा परिषद आदर्श प्राथमिक शाळा तळेरे नं. १ या शाळेचा गौरव करण्यात आला, तसेच राज्यस्तरीय प्रश्नमंजुषा स्पर्धेत राज्यात चौथा क्रमांक मिळवल्याबद्दल श्रीमती ज्योती ब्रह्मदंडे यांचाही विशेष सत्कार करण्यात आला. यासोबतच राज्यस्तरीय आयडॉल टीचर प्रवीण कुबल, उत्कृष्ट शिक्षक विनायक जाधव, परसबाग स्पर्धेत प्रथम क्रमांक मिळवलेली केंद्रशाळा साळीस्ते आणि तालुकास्तरावर 'मुख्यमंत्री माझी शाळा' अभियानात यश मिळवलेले खारेपाटण नं. १ चे मुख्याध्यापक प्रदिप श्रावणकर यांचा शाल, श्रीफळ आणि सन्मानचिन्ह देऊन गौरव करण्यात आला.

          ​यावेळी दशरथ भिकू शिंगारे, निलेश ठाकूर, अर्चना तळगावकर, प्रशांत कुडतरकर, अजय सावंत, सत्यवान केसरकर, मंगेश खांबाळकर, गुरुप्रसाद पाटील, जमसू गावित, संदेश तांबे, गोरखनाथ गायकवाड, राजेश तेरवणकर, संतोष धुळप, नाजमीन मुल्ला इत्यादी शिक्षकवृंद उपस्थित होते. या सोहळ्यात बोलताना रामचंद्र नारकर यांनी आपल्या सेवाकाळातील आठवणींना उजाळा दिला. तसेच कैलास राऊत, संजय पवार, प्रदिप श्रावणकर, प्रवीण कुबल, दशरथ शिंगारे, विनायक जाधव आणि इरफान सारंग यांनी नारकर यांच्या कार्याचे कौतुक करून त्यांना पुढील वाटचालीस शुभेच्छा दिल्या. 

          कार्यक्रमाचे सूत्रसंचालन श्रीराम विभुते यांनी अत्यंत नेटकेपणाने केले, तर सिताराम पारधीये यांनी उपस्थित सर्वांचे आभार मानले. या सभेला तळेरे प्रभागातील बहुसंख्य मुख्याध्यापक आणि शिक्षक उपस्थित होते.