🔴 कणकवली तालुका गॅरेज असोसिएशन कडून दशरथ ( पिंट्या ) सुरेश चव्हाण ( नवनिर्वाचित तालुका अध्यक्ष , कणकवली तालुका गॅरेज असोसिएशन ) यांना आर्थिक साहाय्य

 🔴 कणकवली तालुका गॅरेज असोसिएशन कडून दशरथ ( पिंट्या ) सुरेश चव्हाण ( नवनिर्वाचित तालुका अध्यक्ष , कणकवली तालुका गॅरेज असोसिएशन ) यांना आर्थिक साहाय्य

🔵 गॅरेजला आग लागून नुकसान झाल्याबद्दल दिला पिंट्या चव्हाण यांना मदतीचा हात

कणकवली : 

          आज दिनांक 22 डिसेंबर 2021 रोजी सकाळी दशरथ चव्हाण यांच्या गांगो वाडी येथील ' श्री मोटर्स ' या स्वमालकीच्या टू व्हीलर गॅरेजला शॉर्ट सर्किट होऊन अचानक आग लागली. त्यामुळे त्यांचे सुमारे ऎशी हजार रुपयांचे आकस्मिक नुकसान झाले आहे. हल्लीच त्यांनी कोल्हापूर येथून नवीन माल भरला होता. तो सर्व माल व किमती वस्तू आगीच्या भक्ष्यस्थानी पडल्या. दुकान बंद असताना ही घटना घडल्याने काहीही करता आले नाही.दशरथ चव्हाण यांच्या एका जवळच्या नातेवाईकांच्या घरी धार्मिक कार्यक्रमासाठी जात असताना त्यांना त्यांच्या एका ग्राहकाने फोन करुन आग लागल्याचे कळवले. 

          घटना समजताच दशरथ उर्फ पिंट्या चव्हाण तातडीने घटनास्थळी दाखल झाले. कणकवली गॅरेज असोसिएशनच्या वतीने त्यांना तातडीची रोख मदत उत्स्फूर्तपणे देण्यात आली.         

          सिंधुदुर्ग नाभिक संघटनेचे जिल्हाध्यक्ष अनिल अणावकर , त्यांचे भाऊ नाभिक संघटनेचे जिल्हा खजिनदार चंद्रशेखर चव्हाण यांनी झालेल्या आकस्मिक घटनेबद्दल प्रत्यक्ष भेट घेऊन मानसिक आधार दिला.

आदर्श जि. प. प्राथमिक शाळा तळेरे नं. १ येथे 'विद्यार्थी बौद्धिक क्षमता वाढ' या विषयावरील मार्गदर्शनपर व्याख्यानाचा कार्यक्रम संपन्न

           

आजच्या काळातील मुलं ही मूलतःच हुशार आहेत. या मुलांच्या हुशारीचा सकारात्मक दृष्टिकोनातून वापर करून त्यांच्या बौद्धिक क्षमतांचा  विकास होणे आवश्यक आहे. याच हेतूने शाळा व्यवस्थापन समितीचे माजी अध्यक्ष श्री. शशांक तळेकर, श्री. दिलीप तळेकर व विद्यमान अध्यक्ष श्री. राजेश जाधव यांनी शैक्षणिक मार्गदर्शक आणि प्रेरणादायी वक्ते सदाशिव पांचाळ यांच्या *विद्यार्थी बौद्धिक क्षमता वाढ* या विषयावरील मार्गदर्शनपर व्याख्यानाच्या कार्यक्रमाचे आयोजन इयत्ता ५ वी ते ७ वी मध्ये शिकणाऱ्या विद्यार्थ्यांकरीता केले होते. 

यावेळी कार्यक्रमाचे प्रमुख वक्ते सदाशिव पांचाळ यांनी "कोणताही गणिती पाढा एका मिनिटात कसा तयार करावा?" व "आपल्या स्मरणशक्तीचा विकास कसा करावा?" या दोन महत्वाच्या मुद्द्यांवर सखोल मार्गदर्शन केले. त्यास मुलांचा उत्स्फूर्त  प्रतिसाद लाभला.

विद्यार्थ्यांच्या सर्वांगीण विकासासाठी त्यांच्या बौद्धिक क्षमता विकसित होणे अत्यावश्यक आहे. यासाठी विविध प्रकारचे महत्वपूर्ण व प्रोत्साहनपर अनेक कार्यक्रम यापुढील काळात शाळेमध्ये आयोजित केले जातील.  त्याचा लाभ निश्चितच सर्व पालक व विद्यार्थ्यांना होईल. असे प्रतिपादन राजेश जाधव यांनी आपल्या प्रास्ताविकात  केले.

          सदाशिव पांचाळ यांचे मार्गदर्शन विद्यार्थ्यांना भावी काळात स्पर्धा परीक्षेतील यशासाठी नक्कीच उपयुक्त ठरेल. अशा प्रतिक्रिया शिक्षकवर्गाने व्यक्त केल्या. 

          कार्यक्रमाचे सूत्रसंचालन सहा. शिक्षक श्री. विभूते सर यांनी केले तर आभार प्रदर्शन श्रीम. बेळणेकर मॅडम यांनी केले. आभार प्रदर्शनावेळी सदाशिव पांचाळ यांना मुख्याध्यापिका श्रीम. करंदीकर मॅडम यांचे हस्ते पुष्पगुच्छ व आभारपत्र देऊन गौरविण्यात आले.

तळेरे प्रभागस्तरीय ' स्वातंत्र्याचा अमृत महोत्सव ' स्पर्धा उत्साहात संपन्न

तळेरे प्रभागस्तरीय ' स्वातंत्र्याचा अमृत महोत्सव ' स्पर्धा उत्साहात संपन्न

वारगाव : दिनांक ०८ डिसेंबर २०२१ : 

        तळेरे प्रभागस्तरीय ' स्वातंत्र्याचा अमृत महोत्सव ' नुकताच वारगाव नं. ३ शाळेच्या सभागृहात संपन्न झाला. त्यावेळी व्यासपीठावर कणकवली पंचायत समितीच्या सदस्या तृप्ती माळवदे , तळेरे प्रभागाचे शिक्षण विस्तार अधिकारी सुहास पाताडे , वारगावचे माजी सरपंच इरफान मुल्ला , माजी उपसरपंच तथा शाळा व्यवस्थापन समितीचे अध्यक्ष नाना शेट्ये , भिरवंडे केंद्रप्रमुख उत्तम सूर्यवंशी , साळीस्ते केंद्रप्रमुख गोपाळ जाधव , शेर्पे व खारेपाटणचे केंद्रप्रमुख सद्गुरू कुबल , कासार्डे केंद्रप्रमुख संजय पवार , वारगाव नं. ३ शाळेच्या मुख्याध्यापिका कल्पना सावंत आदी प्रमुख व्यक्ती उपस्थित होत्या. अध्यक्षस्थानावरुन बोलताना पंचायत समिती सदस्या तृप्ती माळवदे म्हणाल्या , " सर्व स्पर्धकांनी खेळीमेळीच्या वातावरणात स्पर्धा संपन्न करा व आपल्या प्रभागाचे नाव जिल्ह्यात उंचवा. "

          कार्यक्रमाचे प्रास्ताविक सुहास पाताडे यांनी केले. त्यांनी दिवसभराच्या संपूर्ण स्पर्धेची रुपरेषा स्पष्ट केली. रांगोळी स्पर्धा , चित्रकला स्पर्धा , वक्तृत्व स्पर्धा , निबंध स्पर्धा आणि शिक्षक गायन स्पर्धेत सहभागी स्पर्धकांना प्रोत्साहनपर मार्गदर्शन केले. नाना शेट्ये आणि त्यांच्या सहकाऱ्यांनी प्रभागस्तरीय स्पर्धेला आलेल्या सर्वांना दुपारचे भोजन दिल्याबद्दल व सर्व सोयींची उपलब्धता दिल्याबद्दल वारगाव नं. ३ शाळेचे आभार मानले. इरफान मुल्ला यांनी उपस्थित सर्व स्पर्धकांना शुभेच्छा दिल्या. स्पर्धा सुरु असताना सिंधुदुर्ग जिल्हा प्राथमिक उपशिक्षणाधिकारी रामचंद्र आंगणे यांनी स्पर्धास्थळी भेट दिली व सर्व शिक्षकांशी स्पर्धेसंदर्भात मुक्त संवाद साधला. त्यावेळी त्यांनी या स्पर्धेच्या निमित्ताने विद्यार्थ्यांना स्वातंत्र्याच्या अमृत महोत्सव तनामनात जागवण्यासाठी प्रेरणा द्यावी असे प्रतिपादन केले. त्यावेळी उपस्थित शिक्षकांच्या वतीने केंद्रप्रमुख सद्गुरू कुबल व उपशिक्षक सीताराम पारधिये यांनी आपली मनोगते व्यक्त केली. 

          जाकीर शेख यांनी कार्यक्रमाचे अतिशय उत्तम रीतीने सूत्रसंचालन केले. सीताराम पारधिये यांनी सर्वांचे हार्दिक आभार मानले. कार्यक्रमाला खारेपाटण , शेर्पे , कासार्डे व साळीस्ते केंद्रातील बहुसंख्य शिक्षक व विद्यार्थी उपस्थित होते. तसेच शिक्षक संघटनांचे पदाधिकारीही उपस्थित होते. स्पर्धा ५ वी  ते ७ वी  , ८ वी  ते १० वी  आणि ११ वी ते १२ वी  या तीन गटांमध्ये संपन्न झाली.