साळीस्ते केंद्राची शिक्षण परिषद संपन्न

तरेळे : २७/०९/२०१९ :

          साळीस्ते केंद्राची शिक्षण परिषद तरेळे नं. १ शाळेत अत्यंत शैक्षणिक वातावरणात संपन्न झाली. त्यावेळी साळीस्ते केंद्राचे केंद्रप्रमुख सद्गुरू कुबल, विषयतज्ज्ञ भाऊसाहेब कापसे, सर्पे इत्यादी व्यासपीठावर उपस्थित होते. 

          त्यावेळी जिल्हा विद्या प्राधिकरणाने दिलेल्या नियोजनाप्रमाणे कार्यक्रम घेण्यात आले. तरेळे नं.१ शाळेच्या उपशिक्षिका साक्षी घाडीगावकर यांनी इयत्ता दुसरीच्या भाषा व गणित पुस्तकातील झालेले बदल सांगितले व त्यावर सकारात्मक चर्चा घडवून आणली. केंद्रप्रमुख सद्गुरू कुबल यांनी पीजीआय व ट्विनिंग स्कुल या नवीन संकल्पनेची सविस्तर माहिती समजावून सांगितली. विषयतज्ज्ञ भाऊसाहेब कापसे यांनी दिव्यांगांचे अध्ययन अध्यापन विषयांतर्गत मतिमंद, अध्ययन अक्षम मुलांना कशाप्रकारे अध्यापन करावे याचे मार्गदर्शन केले. शेर्पे केंद्रशाळेचे मुख्याध्यापक दशरथ शिंगारे यांनी नवोपक्रमांचे लेखन कसे करावे याविषयी थोडक्यात माहिती दिली. शिक्षण परिषदेचे सूत्रसंचालन श्रीराम विभुते यांनी केले. 

स्काऊट उपक्रमामुळे विद्यार्थ्यांना सत्कृत्य करण्याची सवय लागते : सुलभा देसाई

कणकवली : दिनांक : २६ सप्टेंबर २०१९ :
          प्राथमिक शाळेपासूनच लहान मुलांना संस्कारांचे बाळकडू पाजावे लागते. स्काऊट- गाईडच्या माध्यमातून विद्यार्थ्यांना जर सुसंस्कारित बनवायचे असेल तर प्रत्येक शाळेने विद्यार्थी स्काऊट- गाईड पथकाची नोंदणी करून जागतिक संघटनेचे सदस्यत्व स्वीकारले पाहिजे असे आवाहन सिंधुदुर्ग भारत स्काऊट्स आणि गाईड्स संस्थेच्या चिटणीस सुलभा देसाई यांनी केले.त्या म्हणाल्या कि स्काऊट उपक्रमामुळे शाळेमध्येच विद्यार्थ्यांना सत्कृत्य करण्याची सवय लागते. म्हणूनच स्काऊट गाईड उपक्रम अत्यावश्यक आहे.
          कणकवली, वैभववाडी, देवगड व मालवण तालुक्यातून आलेल्या स्काऊटमास्तर व गाईडकॅप्टन यांचा उजळणी वर्ग संस्थेच्या वतीने कणकवली गटसाधन केंद्र येथे आयोजित करण्यात आलेला होता. त्यावेळी ८० पेक्षा जास्त प्रशिक्षणार्थी उपस्थित होते. तज्ज्ञमार्गदर्शक म्हणून सुलभा देसाई, शुभांगी तेंडोलकर, विजय मसुरकर, क्लारा डिसोझा, स्नेहा राणे यांनी अतिशय मुद्देसूद मार्गदर्शन केले.
          स्काऊट प्रवेश, प्रथम सोपान , द्वितीय सोपान , तृतीय सोपान, राज्य पुरस्कार, राष्ट्रपती पुरस्कार इत्यादी अभ्यासक्रमांची माहिती देण्यात आली. प्राविण्य पदके मिळवण्यासाठी काय करावे ते सांगण्यात आले. स्काऊट गाईडची तासिका कशी घ्यावी त्याचा अनुभव देण्यात आला. प्रार्थना, झेंडागीत, हावभाव गीत, चढाओढ, गाठीचे विविध प्रकार प्रात्यक्षिक रूपाने घेताना सर्व शिक्षकांनी त्यात उत्स्फूर्त सहभाग घेतला. स्काऊट ,रेन ,बल्ले बल्ले, बटरफ्लाय , चायनीज, शाब्बास क्लॅप्स यांचेही प्रत्यक्ष सामूहिक सादरीकरण घेण्यात आले. विविध प्रकारच्या आरोळ्या शिकवण्यात आल्या.
          खरी कमाई , जिल्हा मेळावा, राज्य मेळावा , राष्ट्रीय जांबोरी , जागतिक जांबोरी यामध्ये सहभागी होण्यासाठी करावयाच्या उपक्रमांविषयी अधिक माहिती देण्यात आली. स्काऊट समुदाय प्रकल्प राबवताना करावयाचे उपक्रम गीतमंच, पाणपोई, स्वच्छता , गावजत्रा , आंगणेवाडी जत्रा, वसुंधरा विज्ञान केंद्र, व्यसनमुक्त जीवन, तंबाखूमुक्त शाळा, इंद्रधनुष्य मिशन, आपत्कालीन व्यवस्थापन, रक्तदान, पल्स पोलिओ , प्लास्टिक निर्मूलन इत्यादी मध्ये  स्काऊट गाईड पथकाला सामावून घेऊन सामाजिक कार्यक्रमात सक्रिय होण्यासाठी प्रेरणा देण्यात आली.
          प्रशिक्षणामध्ये कणकवली तालुक्याचे गटशिक्षणाधिकारी संदेश किंजवडेकर यांनीही सदिच्छा भेट देत  आपल्या लहानपणीच्या आठवणी सांगत स्काऊट उपक्रम हा आजच्या काळाची गरज आहे असे स्पष्ट केले. निवडक प्रशिक्षणार्थीनी आपले मनोगत व्यक्त केले. शुभांगी तेंडोलकर यांनी आभार व्यक्त केले.

टॅग मिटिंगने दिला इंग्रजी शिक्षकाला एक नवा आयाम : सद्गुरू कुबल

साळीस्ते : दिनांक २३ सप्टेंबर २०१९ :
              गेल्यावर्षीपासून जिल्हा परिषद प्राथमिक शाळांमधील इंग्रजी अध्यापन करणाऱ्या शिक्षकांची टॅग मिटिंग घेतली जाते. या महात साळीस्ते व शेर्पे केंद्राची संयुक्त टॅग मिटिंग साळीस्ते केंद्रशाळेत संपन्न झाली. त्यावेळी साळीस्ते व शेर्पे केंद्राचे केंद्रप्रमुख सद्गुरू कुबल हे  निरीक्षक म्हणून प्रामुख्याने उपस्थित होते. ते म्हणाले कि शासनाने अशा प्रकारे टॅग मिटिंग सुरु केल्यामुळे इंग्रजी शिक्षकांना इंग्रजी बोलण्याचा सराव  करण्यासाठी एक नवीन व्यासपीठ उपलब्ध करून दिले आहे. प्रत्येक शिक्षकाने जर यात उत्साहाने सहभाग घेतल्यास सर्व प्राथमिक शिक्षक उत्तम प्रकारे इंग्रजी संभाषण करू शकतात. आपल्या इंग्रजी बोलण्याचा उपयोग प्रत्येक शिक्षकाने जर वर्गाध्यापनात केल्यास वर्गातील प्राथमिक शाळेचे विद्यार्थी इंग्रजी बोलू लागतील व त्यांच्यातील इंग्रजीची भीती कमी होऊन आत्मविश्वास वाढीस लागेल. अशा प्रकारे घडून आल्यास जिल्हा परिषद शाळांमधील विद्यार्थ्यांची संख्या टिकून राहण्यास नक्कीच हातभार लागू शकतो.
                टॅग समन्वयक गोविंद वावदाने यांनी वेळापत्रकाप्रमाणे सर्व घटक घेतले. सुरुवातीला सर्व टॅग शिक्षकांचे स्वागत झाले. प्रतिज्ञा घेण्यात आली. मागील टॅग मिटिंग मधील झालेल्या घटकांवर प्रश्नोत्तरे व चर्चा घेण्यात आली. वॉर्मिंग अप उपक्रमामध्ये इंग्रजी धातुसाधित नामाचा वापर कसा करावा याचे प्रात्यक्षिक घेण्यात आले. इंग्रजी ओघवतेपणाने बोलता यावे यासाठी विविध प्रकारे आपले व्याकरणिक इंग्रजी सुधारण्याकरिता प्रयत्न केले गेले. एरर करेक्शन या उपक्रमाद्वारे  चुकीची वाक्ये सुधारण्याचा खेळ घेण्यात आला. नंतर मेमरी गेममध्ये शिक्षकांचे दोन गट बनवून स्मरणशक्तीवर आधारित खेळ चित्रे आठवून जास्तीत जास्त शब्द सांगण्याचा नाविन्यपूर्ण उपक्रम घेण्यात आला. मिटिंग सलग ३ तास चालली. चुकत चुकत शिकत इंग्रजी बोलण्याच्या प्रयत्नांमुळे प्रत्येक शिक्षकाने आपली इंग्रजीबद्दलची भीती कमी होत आहे असे प्रतिसादामध्ये सांगितले. साळीस्ते शाळेचे पदवीधर शिक्षक सीताराम पारधिये यांनी आभार मानले.

शिक्षक ही व्यक्ती नसून ती एक वृत्ती आणि अभिरुची आहे : संतोष ताम्हणकर

शिक्षक ही व्यक्ती नसून ती एक वृत्ती आणि अभिरुची आहे : संतोष ताम्हणकर

साळीस्ते दिनांक : २१ सप्टेंबर २०१९ :
          शिक्षक दिनाचे औचित्य साधून केंद्रशाळा साळीस्ते नं. १ शाळेमध्ये विद्यार्थी शिक्षक दिनाचे आयोजन करण्यात आले होते. त्यावेळी समारोप प्रसंगी विद्यार्थी शिक्षकांना मार्गदर्शन करताना शाळा व्यवस्थापन समितीचे अध्यक्ष संतोष यशवंत ताम्हणकर बोलत होते. ते म्हणाले , मी लहान असताना ४ थी मध्ये शिकत असताना ७ वी च्या मुलांना शिकवत असे. शिक्षकांचा आदर करणे हे सर्व समाजाचे कर्तव्य आहे. शिक्षक हा मानबिंदू आहे. त्याचे अनुकरण विद्यार्थी करतात. म्हणूनच शिक्षक ही व्यक्ती नसून ती एक वृत्ती आहे, आणि अभिरुची देखील आहे. आज शिक्षकाला समाजात सन्मान दिला जातो.
          साळीस्ते शाळेने या दिनाचे उत्तम नियोजन करून शैक्षणिक उपक्रम राबवला. या दिवशी एकूण ८ विद्यार्थी शिक्षकांनी विविध वर्गांवर सर्व विषयांचे अध्यापन करून एक दिवस शिक्षक बनून शिक्षकांप्रमाणेच अनुभूती घेतली. त्यामध्ये मुख्याध्यापक म्हणून रोशन कांजीर व चंदना गुरव, दिशा कांजीर , रिया कांबळे, प्राची रांबाडे , नितेश ताम्हणकर, श्रवण लिंगायत, सुजल कांबळे यांनी पदवीधर शिक्षक , उपशिक्षक म्हणून काम पाहिले. नियोजनाप्रमाणे सर्व शिक्षकांनी आपापली अध्यापनाची व इतर सोपवलेली कामे परिपूर्ण केली. विद्यार्थी शिक्षक हजेरीवर सह्या केल्या. सूचना वही लिहिली गेली. त्याप्रमाणे कार्यवाही करण्यात आली. अतिथींकडून अभिप्राय पुस्तिका लिहून घेण्यात आली.
          समारोप प्रसंगी सर्व विद्यार्थी शिक्षकांची सन्मान सभा घेण्यात आली. त्यावेळी घाडीगावकर, पाष्टे, वळवी ,पारधिये, बुचडे, कुबल इत्यादी शिक्षकवृंद उपस्थित होते. सर्व विद्यार्थी शिक्षकांनी आपले मनोगत व्यक्त केले. एक दिवस शिक्षक बनल्यानंतर झालेला आनंद प्रत्येकाने अभिव्यक्त केला. शिक्षक म्हणून काम करणे सोपे नसते , त्यासाठी खूप अभ्यास करून वर्गावर जावे लागते असे मत व्यक्त करताना प्रत्येकाने शिक्षकांबद्दल आदरपूर्वक प्रतिक्रिया व्यक्त केल्या. रिया कांबळे हिने कार्यक्रमाचे सूत्रसंचालन केले.