🔴 किर्लोस आंबवणेवाडी शाळेत स्वातंत्र्य दिनानिमित्त भेटवस्तू वाटप

🔴 किर्लोस आंबवणेवाडी शाळेत स्वातंत्र्य दिनानिमित्त भेटवस्तू वाटप

         किर्लोस आंबवणेवाडी येथील जिल्हा परिषद शाळेत स्वातंत्र्य दिनाचा उत्साहपूर्ण सोहळा पार पडला. या वेळी शाळेतील अंगणवाडी ते सातवीच्या सर्व विद्यार्थ्यांना, तसेच शिक्षक वर्ग, शालेय पोषण आहार कर्मचारी आणि अंगणवाडी सेविकांना कै. अशितोष तुकाराम कुबल यांच्या स्मरणार्थ हर्षदा प्रवीण कुबल यांच्या वतीने भेटवस्तू देण्यात आल्या.

          या कार्यक्रमाला गावातील प्रतिष्ठित नागरिक, पदाधिकारी, शाळा व्यवस्थापन समितीचे सदस्य आणि आजी-माजी विद्यार्थी मोठ्या संख्येने उपस्थित होते. शाळेचे मुख्याध्यापक शेंगाळ सर, सावंत सर, राजम मॅडम आणि गावडे मॅडम यांनी हर्षदा कुबल कुटुंबीयांचे आभार मानले.

हर्षदा प्रवीण कुबल यांनी विद्यार्थ्यांना स्वातंत्र्य दिनाचे महत्त्व सांगितले आणि त्यांना अनमोल मार्गदर्शनही केले. या उपक्रमामुळे शाळेतील विद्यार्थी आणि शिक्षकांमध्ये आनंदाचे वातावरण निर्माण झाले.

🔴 ग्रामीण महिलांसाठी सरपंच नाना शेट्ये यांचा अनोखा उपक्रम: पाककला विजेत्यांना विमान प्रवास!

🔴 ग्रामीण महिलांसाठी सरपंच नाना शेट्ये यांचा अनोखा उपक्रम: पाककला विजेत्यांना विमान प्रवास!

         कणकवली तालुक्यातील वारगांव गावात जिल्हा परिषद शाळेच्या वतीने नुकत्याच आयोजित करण्यात आलेल्या पाककला स्पर्धेने एक वेगळाच आदर्श निर्माण केला आहे. या स्पर्धेत विजेत्या ठरलेल्या तीन महिलांना सरपंच नाना शेट्ये यांच्या पुढाकाराने चक्क गोवा ते मुंबई असा मोफत विमान प्रवास करण्याची संधी मिळाली. ग्रामीण भागातील महिलांना अशाप्रकारे विमान प्रवासाचा अनुभव मिळवून देणाऱ्या या स्तुत्य उपक्रमाचे सर्वत्र कौतुक होत आहे.

🔹 पाककला स्पर्धेचे निकष आणि विजेते

         या स्पर्धेत सहभागी झालेल्या स्पर्धकांना तृणधान्यांचा वापर करून पारंपारिक, पौष्टिक आणि कमी खर्चात पदार्थ बनवायचे होते. तसेच, इंधन बचत आणि पदार्थ बनवण्यासाठी लागणारा वेळ यांसारख्या बाबींचाही विचार करणे आवश्यक होते. या सर्व निकषांवर आधारित स्पर्धेत सौ. रवीना रवींद्र गुरव यांनी प्रथम क्रमांक, कु. अंजली दशरथ गुंडये यांनी द्वितीय, तर सौ. पूजा योगेश पेटकुलकर यांनी तृतीय क्रमांक पटकावला.

          स्पर्धेच्या सुरुवातीलाच सरपंच नाना शेट्ये यांनी जाहीर केले होते की, पहिल्या तीन विजेत्यांना बक्षीस म्हणून विमान प्रवासाची भेट दिली जाईल. त्यानुसार, आज दि. १३-०८-२०२५ रोजी या तिन्ही विजेत्या, त्यांच्यासोबत शाळेच्या मुख्याध्यापिका सौ. ऋतुजा दिनेश जंगले यांच्यासह गोवा येथून मुंबईकडे रवाना झाल्या.

🔹 सर्वत्र कौतुकाचा वर्षाव

         ग्रामीण भागातील महिलांना अशा प्रकारची अनोखी संधी दिल्याबद्दल स्पर्धकांनी आणि सर्व शिक्षकांनी सरपंच नाना शेट्ये यांचे विशेष आभार मानले. त्यांच्या या उपक्रमामुळे महिलांच्या कलागुणांना प्रोत्साहन मिळाले असून, त्यांना एक अविस्मरणीय अनुभवही मिळाला आहे. या अभिनव कल्पनेमुळे सरपंच नाना शेट्ये यांचे सर्वत्र कौतुक होत आहे.

🔹मनोहारी श्रावण

🔹मनोहारी श्रावण

          श्रावण येतो आणि सृष्टीचे रूपच पालटून जाते. उन्हाळ्याच्या तडाख्यानंतर पावसाची सर येते आणि मातीला एक वेगळाच गंध येतो. श्रावण महिन्यात निसर्गाचं सौंदर्य अधिकच खुलून दिसतं. सर्वत्र हिरवळ पसरते, जणू काही पृथ्वीने हिरवीगार शालच पांघरलेली असते.

          सह्याद्रीच्या उंच कड्यांवरून कोसळणारे धबधबे मन मोहून टाकतात. आकाशात रेंगाळणारे काळे ढग, त्यात चमकणारी वीज आणि त्यानंतर येणारा ढगांचा गडगडाट एक वेगळाच अनुभव देतो. झाडांच्या पानांवरून ओघळणारे पावसाचे थेंब, त्यावर पडणारा सूर्यप्रकाश आणि इंद्रधनुष्याचे सात रंग मन हरवून टाकतात.

          या काळात मोर पिसारा फुलवून नाचतात आणि पक्षांचे थवे आकाशात विहार करतात. रानात विविध रंगांची फुले फुलतात. पिवळ्या हरणांचे कळप इकडे तिकडे बागडताना दिसतात. अशा या चैतन्यमय वातावरणात मन कशातच रमत नाही. श्रावण महिना आपल्याला निसर्गाच्या जवळ घेऊन जातो. तो आपल्याला एक वेगळीच ऊर्जा देतो.

          कवी उदय सर्पे यांनी श्रावणाचे हे मनमोहक वर्णन अतिशय सुंदर शब्दांत मांडले आहे. त्यांचे शब्द श्रावणाचे चैतन्य आपल्यासमोर उभे करतात.

🔸चेतनामय श्रावण 

सृष्टीचे चैतन्य बहरते श्रावणात.

असे काय घडते या महिन्यात. 

अनेक बदल होतात अंतरंगात 

उन्हाळा हिवाळा असे दोन ऋतू

पावसाळ्यात बरेच जाते ऊतू 

मृगनक्षत्र ते आश्लेषा रूप जसे 

काय वर्णावे सृष्टीचे सौंदर्य हे असे 

जिकडे पहावे तिकडे नववधुचा साज

कोण पांघरतो वसुंधरेवर हिरवा बाज

सह्याद्रिच्या कडेकपारीतून वहाणारे निर्झर 

विलोभनीय ते दृष्य पाहून डोळे निवतात 

पक्ष्यांचे थवे पाहूनी नयनरम्य तो देखावा 

मध्येच सोसाट्याच्या वा-याचा मंद स्वर ऐकावा 

रानातूनी पिवळी हरणे दिसतात तेजस्वी 

फूलांचे विविध नमुने दृष्टीक्षेपात नयनी.

श्रावणाचे चैतन्यमय जीवन जगावे आणि स्मरावे.

असाच श्रावण आपुल्या जीवनी चैतन्य देऊनी जावा.

              कवी-उदय सर्पे.कसवण 

              ता.कणकवली जि.सिंधुदुर्ग 

                   पिन-४१६६०२

                 मधुभाषा-९४०३२२८३६४