🔴 सायकलिंगने 'फ्रोजन शोल्डर'वर मात

🔴 सायकलिंगने 'फ्रोजन शोल्डर'वर मात

प्रिय मित्रवर्य आद. प्रवीण सर,

तुमच्या प्रोत्साहनपर शब्दांसाठी मनापासून धन्यवाद.

गेल्या मार्चपासून मी 'फ्रोजन शोल्डर'ने त्रस्त होतो. खांद्याचं दुखणं इतकं वाढलं होत की, डॉक्टरांनी केलेले सगळे उपाय थकले. खांद्याच्या हाडात इंजेक्शन दिलं (त्या वेदना सहन करण्यापलीकडच्या होत्या), लेप लावले, गोळ्या-काढे असे अनेक उपचार केले, पण काहीच फरक पडला नाही. हात दुखतच राहिला. शेवटी, मी ठरवलं की माझी सायकलच मला यातून बाहेर काढू शकते.

काल, रविवारी सकाळी 6 वाजता मी माझ्या राइडची सुरुवात केली. सावंतवाडीच्या सालईवाडा येथील भक्ती हॉस्पिटलजवळून निघालो आणि इन्सुली-खामदेव वळण घेऊन कुडाळच्या दिशेने निघालो. कुडाळमध्ये पोहोचत असतानाच मित्र अमितचा फोन आला, "मागे ये, सायकल पंक्चर झालीये!" यात आमचे 45 मिनिटे वाया गेले. तिथून पुन्हा निघालो, पण 20 मिनिटांतच त्याचा परत फोन, "पंप तुटून चाकात अडकला!" पुन्हा मागे गेलो.

कणकवलीला आम्ही 10:30 वाजता पोहोचलो. नांदगावच्या आसपास त्याचा पुन्हा फोन आला, "पायात क्रॅम्प आले आहेत, काय करू?" माझ्याकडे स्प्रे होता, तो दिला. कसातरी आम्ही नाडगिवे घाटापर्यंत पोहोचलो. पण त्यानंतर परिस्थिती गंभीर झाली. त्याला पायच हलवता येईना.

कसेतरी आम्ही खारेपाटणला दिलेल्या वेळेच्या फक्त अर्धा तास आधी पोहोचलो. तिथे स्ट्रेचिंग करून आम्ही परतीचा प्रवास सुरू केला. वाटेत मी त्याला राइड सोडू नको असं सांगत पुढे निघालो, पण वेळोवेळी फॉलोअप घेत होतो. कणकवलीला पोहोचल्यावर लक्षात आलं की आम्ही ठरलेल्या वेळेत पोहोचू शकणार नाही.

मग 'ठोकून काढण्या'शिवाय पर्याय नव्हता. सायकल आणि आतडी दोन्ही पिळवटून काढली. शेवटी मळगाव घाटाची चढाई करताना "लवथवती विक्राळ ब्रम्हांडी माळा..." म्हणजे काय, याचा खरा अर्थ कळला.

अखेरीस, ठरलेल्या वेळेच्या एक तास आधी, म्हणजे 6:30 वाजता राइड पूर्ण केली.

आपलाच,

उमेश मोरे.

🔴 कणकवली पंचायत समितीमध्ये AI तंत्रज्ञानावर प्रशिक्षण कार्यशाळा संपन्न

🔴 कणकवली पंचायत समितीमध्ये AI तंत्रज्ञानावर प्रशिक्षण कार्यशाळा संपन्न

कणकवली: आधुनिक तंत्रज्ञानाचा वापर प्रशासकीय कामांमध्ये वाढावा यासाठी शनिवार, १३ सप्टेंबर २०२५ रोजी कणकवली पंचायत समितीमध्ये कृत्रिम बुद्धिमत्ता (AI) या विषयावर एक दिवसीय विशेष प्रशिक्षण कार्यशाळा आयोजित करण्यात आली होती. या कार्यशाळेत कणकवली आणि वैभववाडी पंचायत समितीमधील गटविकास अधिकारी, विस्तार अधिकारी आणि इतर कर्मचारी सहभागी झाले होते.

          या प्रशिक्षणाचे प्रास्ताविक गटविकास अधिकारी अरुण चव्हाण यांनी केले. त्यांनी AI (Artificial Intelligence) चे महत्त्व आणि प्रशासकीय कामकाजात त्याचा उपयोग कसा करता येईल, याबद्दल सविस्तर माहिती दिली. या कार्यक्रमाला वैभववाडी पंचायत समितीचे गटविकास अधिकारी रामचंद्र जंगले यांचीही प्रमुख उपस्थिती होती.

          प्रशिक्षणाच्या सुरुवातीला गटविकास अधिकारी अरुण चव्हाण यांच्या हस्ते, शिडवणे नं. १ शाळेचे मुख्याध्यापक प्रवीण कुबल आणि लोरे शाळेचे उपशिक्षक नितीन पाटील या तज्ज्ञ मार्गदर्शकांचे पुष्पगुच्छ देऊन हार्दिक स्वागत करण्यात आले.

          या मार्गदर्शकांनी सोप्या भाषेत AI तंत्रज्ञानाचे विविध पैलू आणि त्यांचा दैनंदिन कामकाजात उपयोग कसा करता येईल, याबाबत प्रात्यक्षिकासह माहिती दिली, ज्यामुळे सर्व कर्मचाऱ्यांचा उत्साह वाढला.

          या कार्यशाळेत सहाय्यक गटविकास अधिकारी मंगेश वालावलकर, पंचायत विस्तार अधिकारी सूर्यकांत वारंग, विस्तार अधिकारी संजय कवटकर, विठ्ठल ठाकूर, प्रमोद ठाकूर आणि प्रथम जाधव यांच्यासह कृषी अधिकारी शशिकांत भरसट आणि कक्ष अधिकारी अनिल चव्हाण हे उपस्थित होते.

          या प्रशिक्षणामुळे कर्मचाऱ्यांना प्रशासकीय काम अधिक प्रभावीपणे आणि कमी वेळेत पूर्ण करण्यासाठी मदत होणार असून, पंचायत समितीचे कामकाज अधिक गतिमान होईल, असा विश्वास गटविकास अधिकारी अरुण चव्हाण यांनी व्यक्त केला.

🔴 स्काऊट गाईडच्या शिक्षकांना व्यावसायिक प्रशिक्षणाचे धडे

🔴 स्काऊट गाईडच्या शिक्षकांना व्यावसायिक प्रशिक्षणाचे धडे

सिंधुकौशल्य - बहुविध कौशल्य अभ्यासक्रमाचे बातमीपत्र

तळेरे (प्रतिनिधी) - भारत स्काऊट आणि गाईड कार्यालय, सिंधुदुर्ग अंतर्गत वामनराव महाडिक हायस्कूल, तळेरे येथे शुक्रवार, १२ सप्टेंबर २०२५ रोजी एक दिवसीय उजळणी वर्गाचे यशस्वी आयोजन करण्यात आले. या वर्गात स्काऊट गाईड शिक्षकांना विविध कौशल्यांवर आधारित विशेष मार्गदर्शन मिळाले.

          कॉज टू कनेक्ट फाउंडेशन पुणे या सामाजिक संस्थेद्वारे सिंधुदुर्ग जिल्ह्यात सुरू असलेल्या बहुविध कौशल्य अभ्यासक्रमाचे जून ते ऑगस्ट २०२५ या तीन महिन्यांतील विशेष घडामोडींवर आधारित त्रैमासिक गणेश चतुर्थीनिमित्त प्रकाशित करण्यात आले होते. या त्रैमासिकात विविध शाळांमध्ये घडलेल्या महत्त्वाच्या बाबींवर प्रकाश टाकण्यात आला आहे.

          याच उपक्रमाचा भाग म्हणून आयोजित या उजळणी वर्गात, श्री. सुचित भोगले यांनी शिक्षकांना अनेक महत्त्वपूर्ण विषयांची सखोल माहिती दिली. यामध्ये अन्न प्रक्रिया (पौष्टिक अन्नपदार्थ, मोड आलेल्या कडधान्यांपासून भेळ, शेंगदाणा चिक्की, पंचखाद्य ड्रायफ्रूट्स, मोदक तयार करणे), ऊर्जा आणि पर्यावरण, व्यावसायिक प्रशिक्षण, आणि साहित्याची ओळख व वापर यासारख्या विषयांचा समावेश होता.

          या उजळणी वर्गामध्ये शिक्षकांना दैनंदिन जीवनातील व्यावहारिक कौशल्यांचे अधिकचे मार्गदर्शन लाभले. यामध्ये किचनपासून दूर, फ्युज बदलणे, वायरिंग, अर्थिंग यांसारख्या गोष्टींची प्रात्यक्षिके दाखवण्यात आली. तसेच अभियांत्रिकी तंत्रज्ञान (वेल्डिंग, सुपली), सुतार काम (पॅड, थ्रेडिंग करणे) आणि मल्टी स्किल यांसारख्या कौशल्यांवरही भर देण्यात आला.

          कार्यक्रमातील एक विशेष आकर्षण म्हणजे बागकाम आणि शेती तंत्रज्ञान यावरील मार्गदर्शन होते. यात मल्चिंग शेती, जनावरांची काळजी आणि जनावरांचे वय ओळखणे यासारख्या विषयांवर उपयुक्त माहिती देण्यात आली. त्याचबरोबर, लेबलिंग, कॉस्टिंग आणि पॅकिंग या व्यावसायिक बाबींबद्दलही मार्गदर्शन करण्यात आले.

           याच प्रशिक्षणातून तयार झालेल्या विद्यार्थ्यांनी यापूर्वी गणेश चतुर्थीमध्ये बनवलेल्या उत्पादनांमधून चांगला फायदा मिळवल्याचा उल्लेख यावेळी करण्यात आला. त्यामुळे हे प्रशिक्षण केवळ विद्यार्थ्यांनाच नाही, तर शिक्षकांनाही व्यावसायिक प्रगतीसाठी उपयुक्त ठरत असल्याचे दिसून आले.

          या कार्यक्रमाला श्री. कमलेश बिडये (समन्वयक, वैभववाडी) आणि श्री. विकी कासले (निदेशक) यांची प्रमुख उपस्थिती लाभली. त्याचबरोबर अंजली माहुरे, सोमनाथ गायकवाड, अर्चना बागवे, रेखा वंटे, स्नेहलता राणे, प्रवीण कुबल, संजय नेबापुरे, आणि लक्ष्मण मिसाळ आदी स्काऊट तज्ज्ञ मार्गदर्शकही उपस्थित होते. त्यांनी शिक्षकांना मार्गदर्शन केले आणि त्यांच्या प्रयत्नांचे कौतुक केले. हा उजळणी वर्ग शिक्षकांसाठी अत्यंत उपयुक्त ठरला, ज्यामुळे त्यांच्या कौशल्यांमध्ये अधिक भर पडली आणि त्यांना पुढील वाटचालीस प्रेरणा मिळाली. कार्यक्रमाच्या शेवटी, स्काऊट कार्यालयाच्या वतीने व्यावसायिक प्रशिक्षण देणाऱ्या टीमचे आभार मानण्यात आले.