🛑 लाड करावे असे मुख्याध्यापक लाडगावकरसर

 🛑 लाड करावे असे मुख्याध्यापक लाडगावकरसर 

          शिक्षक असणे ही शिक्षकाच्या आयुष्यातील अतिशय आनंदाची गोष्ट असते. शिक्षक म्हणून काम करताना पहिल्यांदा उपशिक्षक म्हणून काम करावे लागते. सेवाज्येष्ठतेप्रमाणे मुख्याध्यापक होण्यासाठी प्रदीर्घ सेवा करावी लागते. शिक्षणक्षेत्रात सेवानिवृत्त होईपर्यंत मुख्याध्यापक होता आले तर तो प्रत्येक शिक्षकाच्या आयुष्यातील आनंदाचा क्षण असेल. ज्या दिवशी मुख्याध्यापक पदाची धुरा हाती येईल त्यावेळी नोकरीचे खऱ्या अर्थाने सार्थक होईल. आमचे शिक्षक मित्र सत्यपाल लाडगावकरसर यांच्याबाबत असे म्हटले तरी वावगे ठरणार नाही.  

          कुप्पम प्रशिक्षणासाठी सिंधुदुर्ग जिल्ह्यातील आम्हां शिक्षकांची निवड झाली. तिकडे जाण्यासाठी मार्गदर्शन करणारे पेंढरी हायस्कुलचे विज्ञान शिक्षक सत्यपाल लाडगावकर यांच्याशी संपर्क आला. ग्रुपमध्ये ते सिनियर असल्यामुळे त्यांचे परिपूर्ण मार्गदर्शन लाभले. आज प्रशिक्षणाचा दुसरा दिवस. लाडगावकरसरांना आजच मुख्याध्यापक म्हणून पदोन्नती मिळाल्याचे समजले. ग्रुपमधील सर्वांनाच अत्याधिक आनंद झाला. पालव सरांनी सुंदरसा पुष्पगुच्छ बनवला. सर्व ग्रुपने त्यांचे मनापासून अभिनंदन केले. वारगाव हायस्कुलचे मुख्याध्यापक हनुमंत वाळकेसर यांनी सर्व ग्रुपच्या वतीने लाडगावकरसरांचे पुष्पगुच्छ देऊन अभिनंदन केले. पुढील शैक्षणिक व प्रशासकीय वाटचालीसाठी शुभेच्छा दिल्या. दत्ताराम  सावंतसर यांनी सुंदर हस्ताक्षरात शुभेच्छा कार्ड तयार केले. त्यातील शुभेच्छा संदेश त्यांनी स्वतः कवितारुपाने उत्कृष्ट रीतीने सादर केला. 

          सर्व ग्रुपचा आनंद गगनात मावत नव्हताच , स्वतः लाडगावकर सरांचा खूप खूप आनंदित झालेला चेहरा बघायला मिळाला. खरंच कुप्पम प्रशिक्षणात आमच्या ग्रुपमधील एका सदस्याला मुख्याध्यापक म्हणून पदोन्नती मिळणे ही तशी योगायोगाची गोष्ट होती. आपापल्या कुटुंबातून कित्येक किलोमीटर दूर आलेले आम्ही शिक्षक एका वरिष्ठ शिक्षकाचा अभिनंदनीय सन्मान करत होतो. प्रत्येकाच्या चेहऱ्यावर आनंद ओसंडून वाहत होता. 

          लाडगावकरसर हे एक आदर्श विज्ञान शिक्षक असून ते एक अभ्यासू मार्गदर्शक म्हणूनही त्यांची सिंधुदुर्ग जिल्ह्यात ओळख आहे. ते आमचे एक चांगले मित्र आहेत. ते विद्यार्थीप्रिय शिक्षक आहेत. ते सतत हसतमुख असतात , दुसऱ्यांना मदत करण्यास तत्पर असतात. 

          त्यांचा माझा परिचय तसा पंधरा सोळा वर्षांपूर्वीचा. ते त्यावेळी जसे होते , तसेच आजही आहेत. ते नेहमीच त्यांच्या शैक्षणिक आणि व्यावसायिक पात्रतेत वाढ करीत आले आहेत. त्यांच्या अंगी असलेली नम्रता पाहून आम्हालाही त्यांच्याकडून खूप काही शिकण्यासारखे आहे. त्यांनी शिक्षण क्षेत्रात विविध पुरस्कार स्वतः मिळवले आहेत. त्याचप्रमाणे त्यांनी अनेक उत्तम विद्यार्थी घडवले आहेत. त्यांच्या हातून असेच कार्य उत्तरोत्तर घडत राहो अशा त्यांना कोटी कोटी शुभेच्छा. 

©️ प्रवीण अशितोष कुबलसर ( 9881471684 )