🔴 सावडाव-नांदगाव संयुक्त केंद्राच्या वतीने विद्यार्थी-शिक्षक साहित्य संमेलन उत्साहात

कणकवली (प्रतिनिधी): सावडाव-नांदगाव संयुक्त केंद्राच्या वतीने केंद्रशाळा सावडाव नं. १ येथे नुकतेच विद्यार्थी आणि शिक्षकांच्या एकत्रित साहित्य संमेलनाचे आयोजन करण्यात आले. शालेय जीवनातच विद्यार्थ्यांमध्ये वाचनाची आवड रुजवावी, त्यांच्यातील सर्जनशीलतेला साहित्यिक दृष्टिकोन द्यावा आणि शिक्षकांनाही या उपक्रमातून प्रेरणा मिळावी, या उदात्त हेतूने शासनाच्या १०० दिवसांच्या कार्यक्रमांतर्गत या साहित्य संमेलनाचे आयोजन करण्यात आले होते.

या संमेलनाची सुरुवात उत्साहात ग्रंथदिंडीच्या स्वागताने झाली. केंद्राचे केंद्रप्रमुख तथा स्वागताध्यक्ष सद्गुरू कुबल यांनी आलेल्या मान्यवरांचे हार्दिक स्वागत केले. यानंतर मान्यवरांच्या शुभहस्ते दीपप्रज्वलन, शारदा पूजन आणि ज्ञानज्योती कवी कुसुमाग्रज यांच्या प्रतिमेला आदराने पुष्पहार अर्पण करण्यात आला. नांदगाव नं. १ च्या शिक्षिका प्रतिभा पोकळे यांनी ‘लाभले आम्हास भाग्य बोलतो मराठी’ हे गीत मधुर स्वरात गाऊन कार्यक्रमाची सुंदर सुरुवात केली. केंद्रप्रमुख कुबल यांनी संमेलनाच्या आयोजनाची मूळ संकल्पना आणि त्याचे महत्त्व विशद केले.

या महत्त्वपूर्ण कार्यक्रमासाठी सावडाव गावचे ज्येष्ठ निवृत्त केंद्रप्रमुख र.स. कामतेकर, ज्येष्ठ सामाजिक कार्यकर्ते अण्णा प्रभुदेसाई, नांदगाव केंद्राचे मुख्याध्यापक सुहास सावंत, सावडाव केंद्राच्या मुख्याध्यापिका सुप्रिया हर्णे, उच्चश्रेणी मुख्याध्यापिका श्रावणी जावकर आणि सर्व शिक्षा अभियानाचे विषयतज्ज्ञ सचिन तांबे यांसारखे मान्यवर विचारमंचावर उपस्थित होते.

यानंतर संमेलनाचा महत्त्वाचा भाग म्हणजे विद्यार्थी आणि शिक्षकांचे बहारदार कविसंमेलन रंगले. ओटव नं. १ च्या युवा कवयित्री निधी गांवकर, स्वरा जाधव, समृद्धी तांबे, नांदगाव मधलीवाडी शाळेतील सलोनी शेलार, यशश्री मेस्त्री आणि सावडाव नं. १ च्या चिमुकल्या आर्या वारंग, वेद प्रभुदेसाई यांनी आपल्या स्वतःच्या सुंदर कवितांचे प्रभावी सादरीकरण केले. याचबरोबर शिक्षक सुहास सावंत, प्रतिमा पोकळे, प्रियांका भोगले, सृष्टी सवादे, प्रतिक्षा तावडे, सचिन तांबे, मनोज पिळणकर या काव्यप्रेमी शिक्षकांनीही स्वरचित कविता सादर करून विद्यार्थ्यांना काव्यलेखनाची प्रेरणा दिली.

कविसंमेलनातील उत्कृष्ट सहभागाबद्दल अण्णा प्रभूदेसाई यांनी सर्व विद्यार्थी आणि शिक्षक कवींचे अभिनंदन केले आणि आपल्या शुभेच्छा व्यक्त केल्या. त्यानंतर ‘साहित्य संवाद’ या विशेष सत्रात निवेदक राजेश कदम यांनी माईण नं. १ च्या कवयित्री शिक्षिका सरिता पवार यांची मनमोकळी मुलाखत घेतली. कवयित्री सरिता पवार यांच्या ‘राखायला हवी निजखूण’ या प्रशंसित काव्यसंग्रहाला मिळालेल्या राज्यस्तरीय पुरस्कारांचा उल्लेख करत, त्यांच्या कवितेतील स्त्रीवादी दृष्टिकोन आणि सामाजिक जाणिवांचे विविध पैलू मुलाखतीतून समोर आले. कवयित्री पवार यांनी बालपणापासूनच्या अनुभवांचे आणि सामाजिक वास्तवाचे आपल्या खास शैलीत वर्णन केले. बाई ही केवळ सहन करणारी नसून, अन्यायविरुद्ध आवाज उठवणारी आणि अभिव्यक्ती स्वातंत्र्याची गरज असणारी व्यक्ती आहे, हे त्यांनी प्रभावीपणे सांगितले. त्यांच्या या काव्यप्रवासासाठी त्यांना मिळालेल्या राज्यस्तरीय क्रांतीज्योती सावित्रीबाई फुले काव्यपुरस्कार, विशाखा काव्यपुरस्कार आणि इतर प्रतिष्ठित पुरस्कारांबद्दल दोन्ही केंद्रांच्या वतीने त्यांचा गौरव करण्यात आला.

केंद्रप्रमुख कुबल यांनी कवयित्री सरिता पवार यांना त्यांच्या पुढील शैक्षणिक आणि साहित्यिक वाटचालीस शुभेच्छा दिल्या. र.स. कामतेकर यांनी या संमेलनाच्या प्रभावी आणि सुव्यवस्थित आयोजनाबद्दल आयोजकांचे मनःपूर्वक कौतुक केले. या संमेलनाचे आणखी एक वैशिष्ट्य म्हणजे विद्यार्थी-शिक्षक साहित्य संमेलनाचा आकर्षक सेल्फी पॉईंट, जिथे सर्वांनी एकत्र येत आनंदाचे क्षण कॅमेऱ्यात कैद केले. संमेलनाच्या प्रवेशद्वारावर अंगणवाडी सेविका रेश्मा शेट्ये, पालक प्रियांका प्रभुदेसाई आणि सायली मेस्त्री यांनी सुंदर आणि अर्थपूर्ण रांगोळी साकारली होती. या संपूर्ण संमेलनाचे उत्कृष्ट नियोजन आणि सूत्रसंचालन राजेश कदम यांनी केले. कार्यक्रमाच्या सुरुवातीला केंद्रप्रमुख सद्गुरू कुबल यांनी प्रास्ताविक केले, तर नांदगाव नं. १ चे शिक्षक संतोष देसाई यांनी आभार मानले. या संमेलनात दोन्ही केंद्रांतील अनेक विद्यार्थी आणि शिक्षक मोठ्या संख्येने उपस्थित होते. या कार्यक्रमाच्या यशस्वीतेसाठी केंद्रातील भूषण हर्णे, सचिन राणे, सुप्रिया शेंगाळ, भावना हर्णे, माया पवार, दिनेश जाधव, बजरंग मोहिते, लक्ष्मण राणे आणि इतर सहकाऱ्यांनी मोलाचे सहकार्य केले.