🔹सिंधुदुर्ग आणि रत्नागिरीतील शिक्षकांना दिलासा! नवीन संचमान्यतेच्या निर्णयाला उच्च न्यायालयाची स्थगिती, बदली प्रक्रिया सुरळीत

 🔹सिंधुदुर्ग आणि रत्नागिरीतील शिक्षकांना दिलासा! नवीन संचमान्यतेच्या निर्णयाला उच्च न्यायालयाची स्थगिती, बदली प्रक्रिया सुरळीत

मुंबई/कणकवली: सिंधुदुर्ग आणि रत्नागिरी जिल्ह्यातील प्राथमिक शिक्षकांसाठी एक महत्त्वपूर्ण आणि दिलासादायक बातमी आहे. नवीन संचमान्यता शासन निर्णय, १५ मार्च २०२४ ला आव्हान देणाऱ्या दोन याचिकांवर मुंबई उच्च न्यायालयात सुनावणी झाली. या सुनावणीत न्यायालयाने राज्य शासनाला आहे ती परिस्थिती कायम ठेवण्याचे अंतरिम आदेश दिले आहेत.

Adv. बालाजी शिंदे यांच्यामार्फत दाखल केलेल्या या याचिकांवर ६ मे २०२५ रोजी प्राथमिक सुनावणी झाली. याचिकाकर्त्यांच्या वतीने मांडलेले मुद्दे आणि युक्तिवाद ग्राह्य धरून उच्च न्यायालयाने दिनांक ६ मे २०२५ रोजी महाराष्ट्र शासन, शालेय शिक्षण विभाग, शिक्षण आयुक्त, शिक्षण संचालक आणि जिल्हा परिषद व त्यांचे प्रतिनिधी यांना नवीन संचमान्यतेनुसार कोणतीही पुढील कार्यवाही न करण्याचे स्पष्ट निर्देश दिले आहेत. याचा अर्थ याचिकाकर्त्या शिक्षकांना आता अतिरिक्त ठरवले जाणार नाही. या प्रकरणाची पुढील सुनावणी १६ जून २०२५ रोजी होणार आहे.

या महत्त्वपूर्ण न्यायालयीन आदेशामुळे सिंधुदुर्ग आणि रत्नागिरी जिल्ह्यातील शिक्षकांना मोठा दिलासा मिळाला आहे. नवीन संचमान्यतेमुळे अनेक शिक्षकांवर अतिरिक्त ठरण्याची टांगती तलवार होती, ती आता तात्पुरती टळली आहे.

विशेष म्हणजे, उच्च न्यायालयाने स्पष्ट केले आहे की या अंतरिम आदेशामुळे शिक्षकांच्या जिल्हांतर्गत बदली प्रक्रियेत कोणताही अडथळा येणार नाही. त्यामुळे, बदलीची प्रक्रिया पूर्वनियोजित वेळापत्रकानुसार सुरळीतपणे सुरू राहू शकेल.

महाराष्ट्र राज्य प्राथमिक शिक्षक समिती, शाखा कणकवली यांनी या न्यायालयीन निर्णयाचे स्वागत केले आहे. समितीने सांगितले की, शिक्षकांच्या हितासाठी दिलेला हा महत्त्वपूर्ण अंतरिम आदेश आहे. Adv. बालाजी शिंदे यांनी शिक्षकांच्या बाजूने प्रभावी युक्तिवाद केल्याबद्दल त्यांचे अभिनंदनही समितीने केले आहे.

आता सर्वांचे लक्ष १६ जून रोजी होणाऱ्या पुढील सुनावणीकडे लागले आहे. तोपर्यंत, सिंधुदुर्ग आणि रत्नागिरी जिल्ह्यातील शिक्षकांना दिलासा मिळाला असून, त्यांची जिल्हांतर्गत बदली प्रक्रिया कोणत्याही अडचणीशिवाय पार पडणार आहे.