आषाढी एकादशीचा अनुपम सोहळा: साळीस्ते नं. १ शाळेतील 'विठ्ठल टाळ विठ्ठल दिंडी'

 🔹 आषाढी एकादशीचा अनुपम सोहळा: साळीस्ते नं. १ शाळेतील 'विठ्ठल टाळ विठ्ठल दिंडी'

          आषाढी एकादशीच्या पावन पर्वावर साळीस्ते नं. १ शाळेत 'विठ्ठल टाळ विठ्ठल दिंडी' या अनोख्या उपक्रमाने भक्तीरसात विद्यार्थी आणि पालकांना अक्षरश: चिंब केले. मुख्याध्यापिका संजना ठाकूर मॅडम, नवोपक्रमशील शिक्षक सिताराम पारधीये सर, उपक्रमशील शिक्षिका बुचडे मॅडम आणि वळवी मॅडम यांच्यासह बहुसंख्य पालक वर्ग व विद्यार्थी या सोहळ्याचे साक्षीदार झाले.

          साळीस्ते नं. १ शाळेची ख्याती केवळ शैक्षणिकच नव्हे, तर विविध उपक्रमांसाठीही आहे. प्रत्येक उपक्रम इथे नियोजनबद्ध आणि शिस्तबद्ध पद्धतीने राबवला जातो. विज्ञान प्रदर्शन, स्काऊट उपक्रम, शैक्षणिक उठाव उपक्रम, जागतिक योग दिवस यांसारख्या विद्यार्थ्यांमध्ये प्रेरणा जागवणाऱ्या अनेक उपक्रमांचे हे विद्यालय माहेरघर आहे. या सर्व उपक्रमांमध्ये पालकांचा सहभाग विशेष उल्लेखनीय असतो, हे या शाळेचे वैशिष्ट्य.

          तळेरेपासून अवघ्या काही किलोमीटर अंतरावर असलेली ही केंद्रशाळा अनेक वर्षे उत्कृष्ट दर्जाचे शिक्षण देत आहे. इथले विद्यार्थी केवळ विविध स्पर्धांमध्ये उत्तीर्णच होत नाहीत, तर विशेष श्रेणीमध्ये प्रावीण्य मिळवून शाळेचे आणि गावाचे नाव उज्वल करत आहेत. सध्या सर्वच शाळांसमोर कमी पटसंख्येची समस्या उभी आहे, आणि साळीस्ते नं. १ शाळाही त्याला अपवाद नाही. तरीही, उपलब्ध पटसंख्येतील प्रत्येक विद्यार्थ्याला उपक्रमांमध्ये सक्रिय सहभागी होण्यासाठी येथील उपक्रमशील शिक्षक नेहमीच प्रेरित करताना दिसतात, हे खरोखरच कौतुकास्पद आहे.

          शनिवारी, देवशयनी आषाढी एकादशीच्या निमित्ताने शाळेत उत्कृष्ट दर्जाची आषाढी एकादशी दिंडी सादर करण्यात आली. त्यावेळी विद्यार्थ्यांनी विठ्ठल-रखुमाई आणि दिंडीतील वारकऱ्यांची भूमिका इतक्या लीनतेने पार पाडली की पाहणारे थक्क झाले. विद्यार्थी आणि शिक्षकवृंद एकवटून वारकरी झाले होते. "एक दिवस विठ्ठलासाठी" हा त्यांचा संकल्प खऱ्या अर्थाने साकार झाला. या उपक्रमाने विद्यार्थ्यांना केवळ भक्तीरसात न्हाऊ घातले नाही, तर आपल्या समृद्ध संस्कृतीची आणि परंपरेची ओळखही करून दिली.

          अशा प्रकारचे प्रेरणादायी उपक्रम राबवून विद्यार्थ्यांमध्ये संस्कार आणि मूल्यांची रुजवात करणाऱ्या साळीस्ते नं. १ शाळेला आणि तिथे कार्यरत असलेल्या सर्व शिक्षकवृंदांना माझा साष्टांग प्रणिपात!

🔹 आपला एक शिक्षक मित्र,

प्रवीण अशितोष कुबल, मुख्याध्यापक, शाळा शिडवणे नं. १

 सेल्फी विथ दिंडी उपक्रमशील शिक्षक सिताराम पारधिये सर 

 विठ्ठल आणि रुक्मिणी च्या वेशभूषा मध्ये विद्यार्थी वृंद आणि विद्यार्थी वारकरी 

 रूप पाहता लोचनी सुख झाले हो साजणी 

 विठ्ठल भक्तांचा रमला मेळा