🔴 एक दिवस बळीराजासाठी: शिडवणे कोणेवाडी शाळेचा अभिनव उपक्रम

🔴 एक दिवस बळीराजासाठी: शिडवणे कोणेवाडी शाळेचा अभिनव उपक्रम

शिडवणे : जिल्हा परिषद प्राथमिक शाळा शिडवणे कोणेवाडी येथील विद्यार्थ्यांनी 'एक दिवस बळीराजासाठी' या उपक्रमांतर्गत थेट शेतावर जाऊन शेतीचा प्रत्यक्ष अनुभव घेतला. सन्माननीय माजी जिल्हा परिषद सदस्य आणि माजी वित्त व बांधकाम सभापती रवींद्र उर्फ बाळा जठार यांच्या शेतात हा 'बांधावरची शाळा' उपक्रम उत्साहात पार पडला.

यावेळी आदरणीय बाळा जठार, शाळा व्यवस्थापन समिती अध्यक्ष दीपक पाटणकर, सदस्य संदेश शिर्सेकर, शिक्षकवृंद आणि विद्यार्थी मोठ्या संख्येने उपस्थित होते. सर्वप्रथम विद्यार्थ्यांना शेतात कोणकोणती कामे करायची आहेत, याची सविस्तर माहिती देण्यात आली. शेतीची रोपे एका सरळ रांगेत लावण्यासाठी दोरीचा वापर करण्यात आला. यामुळे कोळपणी करताना सुलभता येते आणि रोपांच्या मुळांपर्यंत हवा खेळती राहते. तसेच कीटकनाशक फवारणी करतानाही सोयीस्कर होते, असे विविध फायदे या पद्धतीच्या शेतीमुळे शेतकऱ्याला मिळतात, याची माहिती विद्यार्थ्यांना देण्यात आली.

शेतमालक मा. बाळा जठार यांनी मुलांसाठी आणलेला नाश्ता उपस्थित सर्व मान्यवर आणि विद्यार्थ्यांना वाटप केला. या अभिनव उपक्रमामुळे विद्यार्थ्यांना शेतीची प्रत्यक्ष माहिती मिळाली आणि त्यांना बळीराजाच्या कष्टाची जाणीव झाली. कार्यक्रमाच्या शेवटी सर्वांचे आभार मानून विद्यार्थी हसत-खेळत घराकडे परतले.

हा उपक्रम विद्यार्थ्यांसाठी अत्यंत माहितीपूर्ण आणि प्रेरणादायी ठरला, ज्यामुळे त्यांना पारंपरिक शेती पद्धती आणि त्याचे फायदे समजून घेण्याची अनोखी संधी मिळाली.