🔹नडगिवे नं. १ शाळेची 'बांधावरची शाळा': बळीराजासाठी एक दिवस!

🔹नडगिवे नं. १ शाळेची 'बांधावरची शाळा': बळीराजासाठी एक दिवस!

नडगिवे नं. १, (२ जुलै २०२५ ) : "आनंदाची शाळा आमची, आनंदाची शाळा, हिरव्या हिरव्या सुरावटींचा आम्हां लागला लळा" हे गीत गुणगुणत जिल्हा परिषद पूर्ण प्राथमिक शाळा नडगिवे नं. १ च्या विद्यार्थ्यांनी आज 'बांधावरची शाळा' एक दिवस बळीराजासाठी या उपक्रमातून शेतीविषयक शिक्षणाचे धडे प्रत्यक्ष गिरवले. या उपक्रमामुळे विद्यार्थ्यांना कष्टाचे महत्त्व आणि बळीराजाच्या अथक परिश्रमाची खऱ्या अर्थाने जाणीव झाली.

'कष्टविना नाही फळ!' या उक्तीप्रमाणे, शेती फुलवण्यासाठी बळीराजाला किती कष्ट करावे लागतात, आसमानी संकटांना तोंड देत तो समृद्धीची स्वप्ने कशी पाहतो आणि ती पूर्ण करण्यासाठी त्याची धडपड कशी असते, हे विद्यार्थ्यांनी अनुभवले. त्याचे संपूर्ण कुटुंब कसे खांद्याला खांदा लावून काम करते आणि त्यामुळे कष्ट कसे हलके व सुखदायी होतात, हेही त्यांना पाहायला मिळाले. बैलांसारखी मुकी जनावरे कुटुंबातील सदस्यांप्रमाणे दिवसभर राबतात आणि आपल्या धन्यावर जीवापाड प्रेम करतात, हे सारे अनुभवण्यासाठी शेतात जाणे किती महत्त्वाचे आहे, हे विद्यार्थ्यांनी या उपक्रमातून शिकले.

या उपक्रमासाठी श्री. अजित गुंडये व त्यांच्या कुटुंबीयांनी मोलाचे सहकार्य केले. त्यांनी मुलांना शेतीच्या विविध कामांची ओळख करून दिली. पूर्वीची शेती आणि आताची आधुनिक शेती यातील फरकही समजावून सांगितला. शेतातील कामे करताना मुलांच्या चेहऱ्यावर आनंद स्पष्ट दिसत होता, जो त्यांच्यासाठी एक अविस्मरणीय अनुभव ठरला.

हा उपक्रम केवळ एक शैक्षणिक अनुभव नसून, तो विद्यार्थ्यांना जमिनीशी जोडणारा, श्रमाचे महत्त्व शिकवणारा आणि अन्नदात्याबद्दल कृतज्ञता व्यक्त करणारा एक प्रेरणादायी दिवस ठरला.